Sky News segir í umfjöllun um málið að móðir Melissa, Alta Apantenco, hafi starfað sem þjónustustúlka og hafi þurft á barnapíu að halda. Hún setti því auglýsingu í dagblað í Fort Worth í Texas, þar sem hún bjó, og auglýsti eftir barnapíu. Hún réði síðan konu til starfa án þess að hitta hana.
Alta fór í vinnu og meðleigjandi hennar lét barnapíuna fá Melissu. En barnapían lét sig hverfa með hana og Alta sá dóttur sína ekki aftur fyrr en í síðustu viku, 51 ári síðar.
Fjölskyldan segir að árum saman hafi lögreglan sakað Alta um að hafa orðið dóttur sinni að bana.
Fjölskyldan gaf aldrei upp vonina um að finna Melissa á lífi og fyrir nokkrum árum stofnuðu þau Facebooksíðuna „Finding Melissa“.
En hreyfing komst af alvöru á málið þegar þau nýttu sér heimasíðuna „Ancestry and 23AndMe“ eftir ráðleggingu frá ættfræðingi.
Victoria Highsmith, dóttir Alta og systir Melissa, sagði að það hafi verið erfitt að fá móður sína til að láta DNA-sýni í té, hún hafi verið orðin þreytt á þessu öllu eftir 51 ár, en sem betur hafi henni tekist að telja hana á það. Vegna þess að hún skilaði inn sýni sem og faðir hennar þá hafi tekist að finna Melissa.
Melissa fannst ekki við að svörun fengist frá erfðaefni hennar heldur frá erfðaefni barna hennar. „Innan þriggja vikna fundum við systur mína,“ sagði Victoria.
Melissa, sem er orðin 53 ára, hefur búið í Fort Worth megnið af lífinu og hafði ekki hugmynd um að hún hefði verið numin á brott frá foreldrum sínum. Þetta kemur fram á Facebooksíðunni „Finding Melissa“ sem hefur nú fengið heitið „We Found Melissa!!!“
