Í síðustu viku var tilkynnt um þjófnað á verkfærum frá byggingasvæði á Nykøbing Falster í Danmörku. Þar höfðu þrír verkfærakassar verið brotnir upp og rafmagnsverkfærum stolið.

Þegar lögreglan kom á vettvang fundu lögreglumenn greiðslukort. Enginn af starfsmönnunum á byggingasvæðinu átti það og „auðveldaði þetta“ því rannsókn málsins töluvert að því er segir í dagbók lögreglunnar.

Hún hafði fljótlega uppi á eiganda greiðslukortsins, 21 árs karlmanni. Hann var handtekinn á heimili sínu. Við leit í bíl hans fannst hleðslutæki sem hafði verið stolið af byggingasvæðinu.

Maðurinn var fluttur á lögreglustöð og yfirheyrður og á von á frekari eftirmálum vegna málsins. Ekki fylgir sögunni hvort hann fékk greiðslukortið sitt aftur.