Á síðustu fimmtíu árum hafa allt að 70% dýrategunda horfið af yfirborði jarðar.  Það er því ekki bjart útlit fyrir lífið hér á jörðinni. Vísindamenn hafa áður komist að þeirri niðurstöðu að við séum nú í miðju sjötta fjöldadauðatímabilinu.

The Guardian segir að þetta taki alþjóðlegur hópur 89 vísindamanna undir í nýrri rannsókn og hvetji þjóðarleiðtoga til að gera meira fyrir líffræðilegan fjölbreytileika.

The Guardian segir að vísindamennirnir telji að verst sé staðan í Suður-Ameríku, Karíbahafi og í Amazonskóginum. Þar hafi allt að 94% dýrategunda horfið síðustu 48 árin.

Þar á eftir kemur Afríka þar sem 66% tegunda hafa horfið.

„Þrátt fyrir vísindin, hörmulegar niðurstöður útreikninga, ástríðufullar ræður og loforð, brennandi skóga, sökkvandi lönd, methita og milljónir manns á flótta, þá halda heimsleiðtogar áfram að halla sér aftur og horfa á framtíðina brenna fyrir augum okkar,“ sagði Tanya Steele, forstjóri náttúruverndarsamtakanna WWF.

Vísindamennirnir segja að meðal annars megi rekja vandann til þess að dýr eiga erfitt með að komast um landsvæði vegna mannvirkja og landbúnaðar.

Sem dæmi má nefna að aðeins 37% af þeim ám heimsins, sem eru lengri en 1.000 km, renna óhindrað alla leið og aðeins 10% friðaðra svæða í heiminum eru tengd saman.

Rannsóknin hefur verið birt í vísindaritinu Biological Reviews.

Í henni kemur fram að fyrstu fimm fjöldadauðatímabilin megi rekja við veðurs og annarra náttúrufyrirbæra. En að þessu sinni bendi allt til þess að fjöldadauðinn sé okkur mönnunum að kenna.