Lögreglan á Suður-Sjálandi og Lálandi og Falstri í Danmörku fann í gær 30 ára konu og 11 mánaða barn hennar í Næbskoven við Præstø. Þau höfðu verið myrt.

Leitað hafði verið að þeim síðan á mánudag í síðustu viku og hafði fjölmennt lögreglulið leitað víða.

Leitin hófst í tengslum við að karlmaður fannst látinn í húsi í Præstø á mánudag í síðustu viku. Lögreglan lýsti þá eftir silfurgrárri Skoda-bifreið en vildi ekki tjá sig um hvort bifreiðin hafi komið henni á sporið og orðið til þess að líkin fundust.

Talsmaður lögreglunnar lagði áherslu á það í samtali við Ekstra Bladet að engin grunur leiki á að utanaðkomandi tengist málinu en nú sé það verkefni lögreglunnar að rannsaka hvað gerðist og hver atburðarásin var.

Talsmaður lögreglunnar sagði að ekki leiki grunur á að konan hafi orðið manninum að bana og af því má ráða að talið sé að maðurinn hafi banað konunni og barninu.