Vinnufélagar Megan Warfield hjá Bowleys Quarters Volunteer slökkviliðinu í Maryland í Bandaríkjunum tóku nýlega hatt sinn ofan í virðingarskyni við Warfield sem þeir segja vera „sannan þjón almennings“.

Warfield var barnshafandi og átti aðeins viku eftir af meðgöngunni þegar hún lenti í umferðarslysi. Henni tókst að komast út úr skemmdri bifreið sinni og fara beint til hins ökumannsins sem var fastur í bifreið sinni sem hafði oltið.

Hún veitti honum fyrstu hjálp og beið hjá honum þar til viðbragðsaðilar komu á vettvang og losuðu hann úr bílnum.

NBC 15 segir að Warfield hafi verið skoðuðu af læknum á vettvangi og úrskurðuð ómeidd. Tæpum 24 klukkustundum síðar kom dóttir hennar í heiminn.

Á Facebooksíðu Bowleys Quarters Volunteer slökkviliðsins var birt færsla um þetta og Warfield hrósað í hástert fyrir að vera „sannur þjónn almennings“. Hún hafi brugðist við af hetjuskap og ósérhlífni.

Hún hafi nýlokið við að skipuleggja og sjá um golfmót í minningu föður síns þegar hún lenti í umferðarslysinu. Hún hafi ekki látið það halda aftur af sér að hún gæti meiðst og strax komið hinum ökumanninum til aðstoðar.