Margir Kínverjar hafa kvartað undan matarskorti eftir að yfirvöld gripu til harðra sóttvarnaaðgerða í nokkrum milljónaborgum vegna kórónuveirusmita. Útgöngubann er í gildi og fólk hefur verið lokað inni heima hjá sér dögum saman. Ung kínversk kona, Wang að nafni, hefur til dæmis setið föst heima hjá manni, sem hún fór á blint stefnumót með, í um eina viku. Hún má ekki fara út vegna sóttvarnaaðgerðanna.

BBC segir að foreldrar Wang hafi verið búin að skipuleggja tíu blind stefnumót fyrir hana. Þegar hún fór á það fimmta kom heldur betur babb í bátinn þegar hún ætlaði heim. Því á meðan hún var heima hjá manninum var útgöngubann sett í Zhengzhou, þar sem hún býr, og má hún því ekki yfirgefa íbúðina hans. Þau hafa því eytt síðustu dögum saman.

Hún hefur skýrt frá þessu á samfélagsmiðlum og er orðin ansi þekkt í Kína fyrir vikið. Hún hefur sagt frá því að hún hafi ákveðið að þiggja matarboð hjá manninum því hann sagðist vera góður kokkur. „Eldamennska hans er ekki upp á marga fiska,“ hefur hún þó sagt.

Þau sátu að snæðingi síðasta fimmtudag þegar útgöngubannið var sett á og því hefur stefnumótið dregist á langinn.

Hún hefur birt myndbönd úr sóttkvínni þar sem maðurinn, sem hún hefur ekki nafngreint, sést elda mat, sinna húsverkum og vinna við tölvu. Wang segir að utan þess að hann sé þögull sem gröfin þá sé hann bara alveg ágætur. „Þrátt fyrir að eldamennska hans sé ekki upp á marga fiska þá heldur hann áfram að elda. Mér finnst það gott,“ sagði hún í samtali við kínverska fjölmiðla.