Bloomberg skýrir frá þessu og segir að í samtali við Sigma TV hafi Kostrikis sagt að hann og samstarfsfólk hans hafi fundið afbrigði, sem sé blanda af Delta og Ómíkron, og hafi nefnt það „Deltacron“ þar sem erfðafræðileg uppbygging þess minni á uppbyggingu Ómíkron með erfðaefni úr Delta.
Kostrikis og teymi hans fundu 25 slík smit að sögn Bloomberg. Teymið sendi upplýsingar um uppbyggingu afbrigðisins í gagnabankann GISAID en í honum er fylgst með stökkbreytingum veirunnar.
Kostrikis sagði að framtíðin verði að leiða í ljós hvort þetta afbrigði sé hættulegra og meira smitandi en önnur afbrigði en persónulega sagðist hann telja að Ómíkronafbrigðið muni verða sterkara og ýta þessu afbrigði út af sjónarsviðinu.
En ekki eru allir jafn sannfærðir að um nýtt afbrigði sé að ræða og telja að niðurstaðan byggist á mistökum á rannsóknarstofunni. Gkikas Magiorkinis, grískur prófessor, sagði að fyrstu rannsóknir bendi til að tæknileg mistök hafi orðið í rannsóknarstofunni og því hafi röng niðurstaða fengist.
Magiorkinis og fleiri sérfræðingar telja að fyrir mistök hafi erfðaefni úr Delta- og Ómíkronafbrigðunum lent í sama sýnatökuglasinu og blandast þannig. Líklega hafi verið leifar af Deltaafbrigðinu í rýminu og sjúklingurinn hafi líkega verið með Ómíkronafbrigðið, eða öfugt.
Kostrikis stendur þó fast á sínu að sögn Aftonbladet og segir að gagnrýnendurnir viti einfaldlega ekki hvaða gögn kýpversku vísindamennirnir eru með. Hann sagði í gær að 52 tilfelli hafi fundist til viðbótar þeim 25 sem fyrst var skýrt frá og að nú verði öll rannsóknargögn send til Grikklands til frekari rannsókna.