Almennt er talið að  karlar hafi meiri óbeit á heimilisstörfum en konur en hvort það er rétt er nú annað mál. Þeir þykja því kannski frekar duglegir við að koma sér hjá því að sinna heimilisstörfum, hvort sem það er að sjá um þvottinn, skúra eða eldhúsverkin. En þetta eru mistök hjá þeim ef marka má niðurstöður nýrrar rannsóknar.

Niðurstöður hennar sýna að karlar geta hleypt meira fjöri í kynlífið og aukið tíðnina með því að taka á sig meiri ábyrgð heima fyrir og sinna húsverkum.

Daily Mail segir að ástralskir vísindamenn hafi gert könnun meðal tæplega 300 gagnkynhneigðra kvenna, sem voru giftar eða í sambandi, um kynlíf þeirra og hver sinnti húsverkunum.

Niðurstaðan er að eftir því sem meira jafnræðis gætti á milli kynjanna, þeim mun ánægðari voru konurnar í samböndum sínum og það skilaði sér út í löngun þeirra til að stunda kynlíf.

Höfundar rannsóknarinnar segja að „kynlífsneistar fljúgi“ þegar karlarnir sjái um sanngjarnan hluta af heimilisstörfunum.

Í grein, sem tveir höfundar rannsóknarinnar skrifuðu í The Conversation, segja þeir að niðurstöðurnar bendi til að lítil löngun kvenna til að stunda kynlíf tengist hugsanlega því vinnuálagi sem er á þeim heima fyrir.

Fyrri rannsóknir hafa sýnt að konur sinna fleiri húsverkum en karlar og eyða meiri tíma í að annast börn en þeir.