Með því að nota prótín úr grísahúð hefur vísindamönnunum tekist að búa til gervihornhimnu. Þetta kemur fram í nýrri rannsókn sem hefur verið birt í vísindaritinu Nature Biotechnology. Rannsóknin er lítil og í raun aðeins frumrannsókn.
Tuttugu blindir einstaklingar og að hluta til blindir fengu nýju hornhimnurnar ígræddar og fengu allir sjónina aftur. Tveimur árum eftir ígræðsluna höfðu engin vandamál komið upp að því er segir í fréttatilkynningu frá háskólanum í Linköping.
Hornhimnan er ysta lag augans. Hún samanstendur aðallega af prótíninu kollagen en mikið er af því í húð svína.
Vísindamennirnir unnu kollagensameindir úr svínahúð og notuðu til að búa til gegnsætt efni, hornhimnu, sem þoldi að vera grætt í fólk.
Mehrdad Rafat, einn af hópnum sem vann að verkefninu, sagði að ef þessar hornhimnur valdi engum vandamálum fyrir þeganna þá muni þetta geta skipt sköpum fyrir blint fólk um allan heim. „Við höfum lagt mikla orku í að tryggja að uppfinningin okkar verði almennt aðgengileg og svo ódýr að hún verði ekki aðeins fyrir þá ríku. Þess vegna verður hægt að nota þessa tækni um allan heim,“ sagði hann að því er segir í fréttatilkynningunni.
Margir kostir fylgja nýju aðferðinni. Sá stærsti er að það er aðeins hægt að geyma venjulegar hornhimnur í tvær vikur áður en þær eru græddar í sjúklinginn. En hornhimnur úr svínahúð er hægt að geyma í allt að tvö ár.
Sjálf aðgerðin er einnig einfaldari. Læknirinn gerir lítinn skurð í augað þar sem ígrædda hornhimnan er sett. Ólíkt því sem er þegar hornhimnur úr fólki eru notaðar þá þarf ekki að sauma.
Vísindamennirnir segja að það sé þörf á að gera stærri rannsókn og síðan verða heilbrigðisyfirvöld að samþykkja að aðferðin verði notuð.
