Fyrrverandi borgarstjóri fjórðu stærstu borgar Rússlands var tekinn höndum af lögreglu í dag fyrir að móðga rússneska herinn. Reuters greindi frá þessu. Grímuklæddir lögreglumenn sáust ráðast inn á heimili Jevgeníj Roizmans. Hann var borgarstjóri Jekaterínborgar á árunum 2013 til 2018 ásamt því að vera áhrifamikill andstæðingur rússnesku ríkisstjórnarinnar. Roizman sagðist hafa verið handtekinn „fyrir eina setningu, „innrásin í Úkraínu.““ Hann bætti við: „Í rauninni er mergur málsins sá að ég kallaði stríð stríð. Það er allt. Því miður hef ég mér enga vörn.“
Samkvæmt Guardian aflaði Roizman sér stuðnings með beinskeyttri og oft á tíðum dónalegri gagnrýni á rússnesku ríkisstjórnina og er þekktur fyrir að móðga og gera grín að embættismönnum á samfélagsmiðlum. Hann hefur lengi notið mikilla vinsælda meðal Rússa um allt landið og þess vegna er talið að yfirvöld í Moskvu hafi látið hann vera hingað til. Nú virðist sem Kremlinu hafi snúist hugur og eru yfirvöld að ganga enn lengra í að þagga niður í andstæðingum sínum en áður fyrr.
Að kalla „sérstöku hernaðaraðgerð“ Rússlands innrás eða stríð gæti leitt til allt að fimm ára fangelsisvistar. Roizman hafði áður verið sektaður þrisvar fyrir að gagnrýna Kremlið og herinn á árinu. Mótmælt var handtöku hans í Jekaterínborg og munu því yfirvöld líklega flytja hann til Moskvu til að forðast frekari óeirðir, samkvæmt AP.
Mannréttindasamtök segja að nær 16.500 Rússar hafa verið handteknir fyrir að mótmæla innrásinni síðan hún hófst síðastliðinn febrúarmánuð.
