Japanski skatturinn er að reyna að snúa við niðursveiflu í tekjum með því að reyna að sannfæra ungmenni til að segja skilið við edrúmennsku. Ungmenni í Japan drekka ekki jafnmikið og fyrri kynslóðir, þannig að skatturinn hratt af stað keppni til að finna leiðir til að auka áfengisneyslu meðal fólks á þrítugs- og fertugsaldri. BBC greindi frá þessu.

Herferðin, sem gengur undir nafninu Sake Viva varar við því að þarlendur áfengismarkaður sé að smækka ört vegna lífsstílsbreytinga ungmenna og er að safna hugmyndum frá þjóðinni til að auka við þróun og kynningu á japönskum áfengisvörum, meðal annars hrísgrjónavíninu sake, viskíi og bjór fyrir ungu fólki. Yfirvöld segja að áfengisneysla Japana hafi minnkað um heilan þriðjung milli tíunda áratugarins og ársins 2020. Eftir komu faraldursins til Japan hrapaði framlag áfengis til ríkiskassans um meira en tíu prósent á ári. Samkvæmt könnun heilbrigðisráðuneytis Japans sögðust næstum 30 prósent Japana ekki drekka áfengi og önnur 26 og hálft prósent drekka sjaldan.

Skatturinn hvatti fólk til að brydda upp á nýjum vörum og nýrri hönnun byggt á nýjum lífsstílum og þróun bragðlauka Japana vegna faraldursins. Það hefur hins vegar verið bakslag og margir hafa sakað skattinn um að reyna að gera ungmenni háð áfengi.