Sláandi myndefni frá Santa Catarina í Brasilíu sýnir hræ um 600 mörgæsa sem rak á land eftir hrikalegan fellibyl sem olli miklum skaða á sunnanverðri strönd landsins þann 10. ágúst síðastliðinn. Dýrabjörgunarhópur sem starfar á svæðinu kom að 622 mörgæsum á ströndinni og voru 596 þeirra dauðar. Aðrir fuglar, skjaldbökur og önnur dýr fundust einnig á vettvangi.
Samkvæmt talsmanni dýrabjörgunarhópsins var ekki hægt að staðfesta það að fellibylurinn hafi drepið allar mörgæsirnar eða hvort eitthvað annað hafi spilað inn í. Mörgæsirnar flytja til Santa Catarina á þessum tíma árs og margar yngri mörgæsir hafa ferðalagið ekki af. Því sé ekki óalgengt að mörgæsahræ skoli á land á þessum sl´pðum en fjöldinn sem fannst nú er afar óvenjulegur. Mörg dýrin sem fundust á ströndinni voru langt komin í rotnunarferlinu og því líklegt að þær hafi dáið á hafi úti og fellibylurinn aðeins skolað þeim að landi.
