Stjórnvöld í Úrúgvæ hafa gripið til þess örþrifaráðs að flytja inn gaddfreðnar flugur til þess að berjast við óværu þar í landi sem heimamenn kalla La Bichera. Nautgriparækt er gríðarlega stór iðnaður í Úrúgvæ og í þeim iðnaði veldur fluga af tegundinni Cochliomyia hominivora miklu tjóni. Flugan heitir á ensku screw worm fly eða skrúfumaðkfluga á okkar ástkæra ylhýra. Flugan dregur nafn sitt af því atferli sínu að hún skrúfar sig inn í hold spendýra og verpir lirfum sínum í sárið. Þegar lirfurnar byrja að þroskast hefjast þær handa við að éta hold spendýranna og valda miklu tjóni sem getur drepið hýsilinn.

Skrúfumaðkflugur valda miklu tjóni í úrúgvæskum landbúnaði og því hafa stjórnvöld gripið til örþrifaráðs. Hinar frosnu flugur eru af sömu tegund og koma frá Panama. Um er að ræða karlkynsflugur sem hafa verið gerðar ófrjóar og er markmið yfirvalda að sleppa þeim út í náttúruna, á sérstökum svæðum með fram landamærum Úrúgvæ við Brasilíu og Argentínu, þar sem skrúfumaðkflugan er einnig landlæg.

Síðar ætla yfirvöld að fara í umfangsmikla útrýmingaherferð á skrúfumaðksflugunni innan Úrúgvæ. Hinar ófrjóu flugur eiga þá að skapa einskonar varnarvegg utan um landið með því að makast við  frjóar kvenflugur. Kvenflugur tegundarinnar makast aðeins einu sinni og eiga hinar ófrjóu flugur því að gera það að verkum að skrúfumaðksflugum eigi eftir að fækka gríðarlega í landinu.

Aðferðin hefur sannað virkni sína í Mið-Ameríku, þar sem flugunni var nánast útrýmt, og núna munu Úrúgvæar skera upp herör gegn óværunni.