Málið er nú fyrir dómi en þeir Christopher Gibbons, 38 ára, og Tyrone Pattern-Walsh, 34 ára, eru ákærðir fyrir fyrir ummæli sem þeir létu falla í hlaðvarpi sem þeir stóðu fyrir. The Sun skýrir frá þessu.
Gibbons sagði að Archie, sem er þriggja ára, sé „andstyggð sem ætti að gera út af við“. Þeir félagar hvöttu einnig til þess að Harry yrði „saksóttur“ og „löglega tekinn af lífi fyrir landráð“ fyrir að vera kvæntur Meghan.
Þeir félagar eru sagðir hata sambönd fólks af ólíkum kynþáttum og hafi notað hjónaband Harry og Meghan sem dæmi í umræðu um þau efni í hlaðvarpinu „Black Wolf Radio“ sem þeir stóðu fyrir.
Þeir neita að hafa hvatt til hryðjuverka öfgahægrimanna í hlaðvarpinu á tímabilinu frá mars 2019 til febrúar 2020. Gibbons neitar einnig að hafa dreift hryðjuverkaefni með því að birta myndbönd á netinu.
Saksóknari sagði fyrir dómi í gær að þeir félagar séu báðir „sanntrúaðir og staðfastir hvítir kynþáttahatarar, sem „aðhyllist öfgahægriskoðanir“. Þeir hafi talið að með því að láta ummælin falla í hlaðvarpi, sem er í formi útvarpssendinga, gætu þeir nýtt sér tjáningarfrelsið. Þeir hafi hins vegar nýtt hlaðvarpið til að hvetja aðra öfgahægrimenn til að fremja hryðjuverk gegn þeim hlutum samfélagsins sem þeir tveir hata.
Í 23 þáttum af hlaðvarpi þeirra félaga lofsömuðu þeir fjöldamorð Brenton Tarrant í Christchurch á Nýja-Sjálandi 2019 en þá myrti hann 51 í tveimur moskum. Þeir fögnuðu einnig morðinu á Jo Cox, þingkonu, 2016. Þeir ræddu einnig um sprengjutilræðið í Manchester Arena 2017, þar sem 22 létust, og sögðu fórnarlömbin hafa verið „druslur“.
