Rafmagnsgítarinn frægi Kurt Cobain notaði í tónlistarmyndbandi lagsins „Smells Like Teen Spirit“ var seldur á uppboði á sunnudag. Hljóðfærið seldist á 4,5 milljónir Bandaríkjadala eða um 585 milljónir í íslenskum krónum. Það er töluvert meira en þær 78 milljónir króna sem gítarinn var settur á.

Eftir langa baráttu hreppti bandaríski milljarðamæringurinn Jim Irsay gripinn en það var uppboðshúsið Julien’s Auctions sem sá um uppboðið. Sjálfur erfði Jim auðæfi sín frá loftræstifyrirtæki föður síns Robert Irsay. Hann er hvað þekktastur sem eigandi bandaríska fótboltaliðsins Indianapolis Colts. Jim á fyrir mikið safn af rokkminjagripum sem hann hefur safnað í gegnum árin en Guitar.com hefur lýst safni hans sem „mesta gítarsafni heims.“

 Cobain-fjölskyldan ætlar að gefa hluta sölugróða gítarsins og annarra gripa tónlistarmannsins heitna í sjóð Irsay-fjölskyldunnar. Samkvæmt Forbes hefur sjóðurinn það að markmiði að efla vitund á bættu geðheilbrigði og fer undir nafninu Kicking the Stigma. 

Gítarinn var víst í uppáhaldi hjá Cobain. Hann var mikið notaður í tónlistarmyndböndum og til að taka upp plöturnar Nevermind og In Utero. Í síðasta viðtali Cobain við Guitar World sagði hann: „Ég er örvhentur og það er ekki auðvelt að finna gæðagítara fyrir örvhenta á rausnarlegu verði. En af öllum gítörum heims, er Fender Mustang uppáhaldið mitt. Ég hef bara átt tvo slíka.“