Fólk sem er með litla menntun að baki er í meiri hættu á að fá krabbamein en þeir sem eru langskólagengnir. En ekki nóg með það því möguleikar langskólagenginna á að lifa krabbamein af eru mun meiri en möguleikar þeirra sem hafa stutta skólagöngu að baki.

Þetta kemur fram í nýrri skýrslu frá Kræftens Bekæmpelse, dönsku krabbameinssamtökunum, þar sem sjónunum er beint að áhrifum félagslegs mismunar á krabbamein.

Jesper Fisker, framkvæmdastjóri samtakanna, segir að þetta sé „mikill og mjög ósanngjarn“ munur sem eigi ekki að þekkjast í velferðarsamfélagi. Hann sagði að ef maður ímyndi sér að allir krabbameinssjúklingar komist jafn vel í gegnum veikindin og þeir sem eru langskólagengnir þá myndu þriðjungi fleiri krabbameinssjúklingar, með stutta eða miðlungslanga skólagöngu að baki, vera á lífi fimm árum eftir að þeir greinast með krabbamein.

Í skýrslunni kemur fram að líkurnar á að vera á lífi fimm árum eftir greiningu séu 77% hjá þeim sem eru langskólagengnir.  Hjá fólki með miðlungslanga skólagöngu að baki, til dæmis starfsnám, eru líkurnar 68% og hjá fólki með stutta skólagöngu að baki eru líkurnar 61%.