Ný kórónuveirubylgja herjar nú á Kína og það hefur orðið til þess að alþjóðafyrirtæki á borð við Toyota, Volkswagen og Apple hafa dregið úr starfsemi sinni í landinu og jafnvel stöðvað hana.

Yfirvöld hafa gripið til harðra sóttvarnaaðgerða og lokunar á samfélagsstarfsemi til að reyna að spyrna við útbreiðslu veirunnar.  BBC Business skýrir frá þessu.

Fjöldi daglegra smita hefur verið í þúsundum síðustu daga sem er auðvitað ekki mikið þegar horft er til þess hversu margir búa í Kína. En þetta er mesti fjöldi smita síðan á fyrstu mánuðum 2020 þegar faraldurinn braust út.

Foxconn, sem framleiðir iPhones fyrir Apple, hefur stöðvað framleiðslu sína í Shenzhen og bíður eftir heimild frá yfirvöldum til að hefja starfsemi á nýjan leik.

Toyota hefur lokað verksmiðju sinni í Jilin-héraði  og Volkswagen hefur lokað verksmiðju sinni í Changchun.