Ef þú átt gamlar útgáfur af bókunum um Harry Potter þá er ekki útilokað að hægt sé að fá góðan skilding fyrir þær. Að minnsta kosti var notuð Harry Potter bók nýlega seld á sem svarar til um 2,6 milljóna íslenskra króna á uppboði.

Um er að ræða fyrstu útgáfu af bókinni Harry Potter og viskusteinninn en aðeins 500 eintök voru prentuð af þessari útgáfu og því er hún mjög sjaldgæf.

Seljandi bókarinnar fann hana í pappakassa í nytjamarkaði í Manchester og greiddi sem nemur 80 íslenskum krónum fyrir hana.  Hún er ekki í toppstandi og í lýsingu Hansons uppboðshússins var tekið fram að hún væri sjarmerandi slitin með teikningum eftir börn á mörgum síðum.

Ekki var búist við að hátt verð fengist fyrir bókina en það var hart barist um hana og endaði verðið eins og fyrr segir í sem nemur um 2,6 milljónum íslenskra króna.