Það ætti að vera alveg óhætt að borða svolítið meira af vínberjum. Niðurstöður rannsóknar vísindamanna við Kaliforníuháskóla sýna að það getur dregið úr líkunum á hjartaáfalli eða heilablóðfalli að borða vínber á milli mála.

Ástæðan er að vínber, eins og flestir ávextir og grænmeti, eru full af næringarefnum sem hafa jákvæð áhrif á heilsu okkar.

Niðurstöður rannsóknarinnar benda til að vínber séu nánast „ofurfæði“ vegna efna, sem þau innihalda, sem örva bakteríur í þörmunum og lækka blóðfituna.

19 manns á aldrinum 19 til 55 ára tóku þátt í rannsókninni. Fólkið var beðið um að borða 40 vínber á dag. Mataræði þátttakendanna var byggt upp á litlu trefjamagni og pólýfenólum. Þetta mataræði var valið svo vísindamennirnir gætu einbeitt sér að ávinningnum af því að borða vínber.

Eftir tæpan mánuð hafði örveruflóran í þörmum þátttakenda stækkað þannig að þátttakendurnir voru með meira af góðum bakteríum í þörmunum. Magn „slæmu“ blóðfitunnar hafði lækkað um 8% og magn Akkermasia bakteríunnar hafði aukist en hún brennir sykri og blóðfitu.

Metro skýrir frá þessu.