Talibanar verða líklega seint sagðir frjálslyndir, umburðarlyndir eða víðsýnir. Þeir hafa þrengt mjög að réttindum stúlkna og kvenna eftir að þeir komust til valda í Afganistan og sífellt berast fréttir af því sem þeir eru að gera. Eitt það nýjasta er að þeir hafa fyrirskipað verslunareigendum að hálshöggva allar gínur. Ástæðan er að það brýtur gegn íslömskum lögum að vera með brúður sem líkjast fólki.

Þetta sagði Aziz Rahman, yfirmaður þess sem má einna helst kalla siðferðisráðuneytis landsins. Hann sagði að verslunareigendum hafi verið fyrirskipað að hálshöggva gínur sínar því þær falli ekki að sharíalögum. Hann sagði að það dugi ekki að hylja höfuðin eða fela gínurnar, englar Allah muni þá ekki koma inn í verslanirnar eða önnur hús til að veita eigendunum blessun sína.

Þessi stefna Talibana gildir enn sem komið er ekki á landsvísu en í vesturhluta landsins eru þeir byrjaðir að láta til sína taka vegna þessa. Nýlega fór upptaka af Talibönum saga höfuð af gínum á flug á samfélagsmiðlum.