Samkvæmt því sem kemur fram í umfjöllun The Guardian þá telja vísindamenn sig hafa fundið elstu merki þess að fólk hafi notað fatnað. Þetta fannst í helli í Marokkó. Um er að ræða verkfæri og bein af dýrum sem hafa verið fláð. Þetta þykir benda til að forfeður okkar hafi búið sér til föt fyrir um 120.000 árum.
Emily Hallett, hjá mannkynssögudeild Max Planck stofnunarinnar í Þýskalandi, er aðalhöfundur rannsóknarinnar. Hún segir að niðurstöðurnar ýti undir fyrri hugmyndir um að forfeður okkar í Afríku hafi verið úrræðagóðir og uppfinningasamir.
Skinn og feldur endist ekki í mörg hundruð þúsund ár og því er erfitt að finna beinar sannanir fyrir notkun fatnaðar forfeðra okkar. En vísindamenn leystu þetta með því að greina erfðaefni fatalúsa. Þær rannsóknir benda til að forfeður okkar hafi byrjað að nota föt fyrir allt að 170.000 árum síðan. Niðurstöður nýju rannsóknarinnar styðja við þessa kenningu.
