Sabina Nessa, 28 ára gamall kennari, var myrt af ókunnugum aðila í almenningsgarði nálægt heimili hennar í London, Englandi. Maður sem var á göngu með hund fann lík hennar undir hrúgu af laufum. Lögreglan á svæðinu hefur handtekið karlmann á fimmtugsaldri sem grunaður er um að hafa framið morðið síðastliðið föstudagskvöld.

Zubel Ahmed, frændi hennar, ræddi við fréttastofu ITV um málið í dag. „Það var ráðist á hana þegar hún var á leiðinni heim, hún var fimm mínútum í burtu frá heimili sínu og hún var að ganga leiðina sem hún hefur farið síðustu vikur,“ sagði Ahmed og bætti við að hún hefði alltaf gengið í vinnuna sína og úr henni.

„Hún ætlaði að fara og hitta fjölskyldu sína um helgina og… hún gat ekki einu sinni séð þau í síðasta skipti.“

Ahmed lýsti frænku sinni í viðtalinu og sagði að hún væri yndisleg manneskja. „Hún var falleg, góð og með umhyggjusama sál.“

Þá sagði hann að fjölskylda hennar væri í sárum og nái ekki utan um það hvernig einhver getur gert svona lagað. „Við fórum og hittum foreldra hennar, þau voru óhuggandi. Þetta er versta leiðin fyrir einhvern til að deyja,“ sagði hann.

„Hættið að segja okkur að við séum að gera of mikið úr hlutunum“

Morðið á Nessa hefur vakið úlfúð hjá fólki enda hefur morðum á konum í almannarýmum í London fjölgað á undanförnum mánuðum. Mótmælendur krefjast þess nú aðgerða og að almennilega verði tekið á ofbeldi gegn konum. „Þetta er ástæðan fyrir því að við göngum ekki þangað sem okkur langar þegar okkur langar að gera það,“ segir til að mynda í yfirlýsingu frá Our Streets Now samtökunum vegna málsins.

„Þetta er ástæðan fyrir því að við verðum stressaðar þegar við heyrum í bíl að koma eða í manni sem gengur yfir götuna í áttina að okkur. Þetta er ástæðan fyrir því að 1 af hverjum 5 stelpum hefur forðast menntunarstað sinn. Vinsamlegast, hættið að segja okkur að við séum að gera of mikið úr hlutunum.“