Hryllilegur atburður átti sér stað í dag í smábænum Espelkamp í héraðinu Nordrhein Westfalen, sem er vestarlega í Þýsklandi. Maður vopnaður byssu skaut fyrrverandi eiginkonu sína og bróður hennar.

Bild greinir frá. Atburðurinn átti sér stað laust fyrir hádegi. Er lögregla kom á vettvang var bróðir konunnar látinn en konan lést skömmu síðar af sárum sínum á sjúkrahúsi.

Sjónarvottar sem sáu til mannsins og heyrðu fjóra byssuhvelli höfðu samband við lögreglu. Hóf lögregla mjög fljótt eftirleit að hinum grunaða og fann hann skömmu síðar, ekki langt frá bænum, eða í um tíu kílómetra fjarlægð. Hann særðist lítillega í skotbardaga við lögregluna og er í haldi lögreglu.

Aðeins 25 þúsund manns búa í Espelkamp og þar munu skelfilegir atburðir á borð við þennan vera fátíðir.

Sá sem grunaður er um morðin er 52 ára gamall. Aldur fórnarlambanna kemur ekki fram í frétt Bild. Maðurinn er sagður hafa ógnað og eltihrellt fyrrverandi eiginkonu sína eftir skilnað þeirra.