Ljósmyndarinn Steven Bailey uppgötvaði og tók óhugnanlegar myndir af yfirgefnu húsi á dögunum. Myndirnar vöktu athygli The Sun sem fjallaði um málið en eigendur hússins létu lífið fyrir þremur árum síðan. Húsið hefur síðan þá verið í niðurníðslu en eins og sjá má á myndunum er mygla og óhreinindi um alla veggi og loft í húsinu.

Steven, sem er 40 ára gamall, segir að magn myglunnar í húsinu hafi verið ótrúlegt. „Hún var út um alla veggi, loft og á húsgögnunum,“ segir hann og bendir á ástæðuna fyrir þessu gríðarlega magni af myglu. „Það er risastórt gat á þakinu svo vatnið lekur í gegn og bleytir allt.“

Húsið var fyrst byggt fyrir fiskeldi en árið 2003 var því breytt í fínt og fallegt sveitasetur. Steven segir að í húsinu séu að minnsta kosti 30 herbergi auk þess sem þar má finna sundlaug innanhúss og afar stóra tjörn í garðinum. Árið 2018 létust eigendur hússins og svo virðist vera sem enginn hafi stigið fæti þangað inn síðan.

„Þrátt fyrir þetta allt saman er stór hluti setursins í merkilega góðu ástandi,“ segir Steven. „Það voru falleg viðarhúsgögn í flestum herbergjunum og jafnvel myndir af fyrri eigendum og gæludýrum þeirra í mörgum herbergjanna.“

Steven segir að honum hafi fundist arininn í stofunni verið áhugaverðastur en um afar stóran og fínan arinn er að ræða. „Þetta hefur verið frábær staður til að sitja saman og slaka á.“

Hér fyrir neðan má sjá nokkrar myndir af sveitasetrinu sem um ræðir: