BKA segir að vefsvæðið hafi verið starfrækt síðan 2019. Der Tagesspiegel skýrir frá þessu. Fram kemur að þrír menn, sem eru taldir höfuðpaurarnir, hafi verið handteknir. Einn er fertugur maður frá Paderborn, annar er 49 ára maður frá München og sá þriðji er 48 ára frá norðanverðu Þýskalandi. Sá síðastnefndi hefur búið í Suður-Ameríku árum saman en var nýverið handtekinn í Paragvæ. Þremenningarnir eru taldir hafa verið stjórnendur vefsvæðisins og þeir eru einnig grunaðir um að hafa komið að stofnun þess.
Vefsvæðið hét Boystown og fengu meðlimir þess leiðbeiningar frá þremenningunum um hvernig þeir ættu að nota vefsvæðið án þess að eiga á hættu að lögreglan kæmist á slóð þeirra.
Boystown er talið vera eitt af stærstu vefsvæðum heims hvað varðar barnaklám. Áður en svæðinu var lokað var hægt að komast inn á það á djúpnetinu. Á vefsvæðinu var barnaklámi, alls staðar að úr heiminum, dreift. Aðallega var um að ræða kynferðisofbeldi gagnvart drengjum.
Meðlimirnir gátu spjallað saman á sérstökum rásum og á þeim gátu þeir einnig skipst á myndefni.
BKA vann að rannsókn málsins í marga mánuði í samvinnu við Evrópulögregluna Europol. Að auk komu lögregluembætti í Hollandi, Svíþjóð, Ástralíu, Bandaríkjunum og Kanada að rannsókninni.
