Margir kannast eflaust við atriði úr kvikmyndum, þar sem górillur koma við sögu, að karldýrin berja sér á brjóst og stundum gefa þau frá sér hróp. Nú hafa vísindamenn rannsakað tilganginn með þessu og fundið út af hverju górillur gera þetta.

Þeir hafa komist að því að þetta gera górillur til að segja öðrum dýrum frá stærð sinni. Þessu er ætlað að hræða dýrin og koma í veg fyrir átök en um leið eru þetta hreinskilin skilaboð þar sem karldýrin skýra frá stærð sinni án þess að ýkja segir Edward Wright, meðhöfundur rannsóknarinnar, að sögn The Guardian.

Wright og félagar rannsökuðu sex górillur i Volcanoesþjóðgarðinum í Rúanda og fylgdust með þeim þegar þær börðu sér á brjóst. Þetta kemur fram í Scientific Reports. Frá nóvember 2015 til júlí 2016 skráðu þeir 36 tilfelli þegar sem þessar sex górillur börðu sér á brjóst. Í ljós kom að það tengdist stærð górillanna ekki hversu lengi þær börðu sér á brjóst eða hversu hratt þær gerðu það. Þeim mun stærri sem dýrin voru, þeim mun lægri tíðni var hljóðið á.

Vísindamennirnir tóku einnig eftir því að þeim mun stærri sem karldýrin voru þeim mun fleiri afkvæmi áttu þau og þau mökuðust einnig með fleiri kvendýrum. Einnig skipti stærðin máli hvað varðar félagslega stöðu þeirra meðal annarra karldýra.

Vísindamennirnir telja að það að berja sér á brjóst geti verið góð aðferð hjá górillum til að veita upplýsingar um stærð sína. Þetta geti hjálpað þeim að tryggja sér kvendýr og forðast hættuleg slagsmál við önnur karldýr.