Page Six skýrir frá þessu. Fram kemur að rekja megi þessa óánægju til þess að í erfðaskránni ánafnaði Larry börnum sínum fimm hús sitt, sem er nú kannski frekar eins og höll. Húsið er metið á tvær milljónir dollara. Þetta er sögð vera „leynierfðaskrá“ sem birtist skyndilega.
Shawn er ekki í neinum vafa um að Larry hafi verið beittur þrýstingi til að skrifa undir þessa erfðaskrá. „Við vorum með skothelda áætlun um hver ætti að fá húsið. Hún er enn til og er í hinni löglegu erfðaskrá. Ég er viss um að hún muni halda fyrir dómi,“ sagði hún. Hjónin skrifuðu undir hana 2015.
Það flækir málið kannski aðeins að Larry sótti um skilnað frá Shawn 2019 en lést áður en skilnaðurinn komst í gegn. Það gerir málið kannski enn snúnara og undarlegra að Larry ánafnar öllum fimm börnum sínum húsið þrátt fyrir að tvö þeirra, Andy og Chiara, hafi látist á síðasta ári.
Áður en hann lést sagði Larry í samtali við Page Six að þau hjónin væru orðnir góðir vinir á nýjan leik. Af þessum sökum segir Shawn að „leynierfðaskráin,“ hafi komið henni mjög á óvart. Hún segir jafnframt að tvö af börnunum styðji mál hennar.
Ef hún hefur sigur fyrir dómi fær hún um 300.000 dollara í sinn hlut en hún segir að þetta snúist ekki um peninga. „Þetta er prinsipp mál,“ sagði hún.
