Stóru orðin voru ekki spöruð á fréttamannafundi í Hvíta húsinu í gær um stöðu mála vegna heimsfaraldurs kórónuveirunnar. Staðan er gjörbreytt vegna Ómíkronafbrigðisins og fóru Anthony Fauci, helsti smitsjúkdómafræðingur Bandaríkjanna, og Jeff Zients, sem sér um samhæfingu aðgerða hins opinbera vegna faraldursins, yfir stöðuna.

„Þú hefur gert það rétta og við komumst í gegnum þetta,“ sagði Zients og beindi þar orðum sínum til þeirra sem hafa látið bólusetja sig gegn veirunni.

Því næst beindi hann orðum sínum að þeim sem ekki hafa látið bólusetja sig: „Þið stefnið inn í vetur með alvarlegum veikindum og dauða ykkar sjálfra, fjölskyldna ykkar og til sjúkrahúsanna sem þið munuð fljótlega streyma til,“ sagði hann og horfði beint inn í myndavélina.

Um 73% Bandaríkjamanna hafa fengið fyrsta skammtinn af bóluefni gegn veirunni en aðeins 61% hafa lokið bólusetningu.