Ef það væri flokkur í Heimsmetabók Guinness um hvaða bíl hafi lengst verið lagt í sama stæðið þá myndi Angelo Fregolent, 94 ára Ítali, væntanlega vera sigurvegari. Árið 1974 lagði hann bláa Lancia Fulvia bílnum sínum í stæði á götunni Via Zamboni í Conegliano. Þar stóð bíllinn óhreyfður allt þar til í október á þessu ári.

The Mirror skýrir frá þessu. Á þessum árum varð bíllinn eiginlega að kennileiti í bænum og meira að segja ferðamannastaður því sumir ferðamenn lögðu leið sína sérstaklega í götuna til að sjá bílinn. Bíllinn varð svo frægur að hann fékk eigin mynd á Google Maps.

En þann 20. október síðastliðinn kom að því að bíllinn væri hreyfður á nýjan leik. Þá létu embættismenn bæjarins fjarlægja hann því staðsetning hans skapaði vandamál fyrir umferð ökutækja og gangandi vegfarenda. Il Gazzettino skýrir frá þessu.

Bíllinn var fluttur á bílasýningu í Padua þar sem hann verður til sýnis um hríð en því næst verður hann sendur í góða yfirhalningu og síðan fer hann aftur í stæðið sitt, eða svona næstum því. Honum verður komið fyrir við Caerletti skólann í Coneglianao en hann er beint á móti heimili Angelo Fregolnet. Hann og eiginkona hans geta því áfram dáðst að bíl sínum og nú einu af kennileitum bæjarins.