Í gær keypti íraskur maður, sem er búsettur í Noregi, sér nýjan Lamborghini Huracan í Þýskalandi og greiddi sem svarar til um 40 milljóna íslenskra króna fyrir bílinn. Hann lagði síðan af stað heim á nýja bílnum. En gleðin yfir að eiga nýjan bíl var skammvinn eða aðeins tvær klukkustundir.

í gærkvöldi var lögreglan við hraðamælingar á vegi nærri Hjørring og þar mældist hraði bílsins 236 km/klst en leyfður hámarkshraði er 90 km/klst. Akstur mannsins var að sjálfsögðu stöðvaður og hann kærður fyrir þennan ofsaakstur.

En lögreglan lagði einnig hald á bíl hans og mun krefjast þess að hann verði gerður upptækur í ríkissjóð. Nordjyske skýrir frá þessu.

Samkvæmt nýlegum lögum á danska lögreglan að leggja hald á ökutæki sem eru notuð við svokallaðan „brjálæðisakstur“ en undir slíkan akstur fellur til dæmis of hraður akstur þegar hraðinn er að minnsta kosti tvöfalt meiri en leyfðu hámarkshraði. Málin fara síðan fyrir dóm þar sem gerð er krafa um að ökutækið, sem notað var, verði gert upptækt til ríkissjóðs.

Ekki er vitað hvort maðurinn vissi af þessum lögum. „Þetta var svolítið fúlt fyrir hann. Nú er búið að leggja hald á bílinn og hann var leiður yfir því,“ sagði Jess Falberg, talsmaður lögreglunnar, við Nordjyske.