Niðurstöður nýrrar rannsóknar benda að sögn vísindamanna til að neysla á fituríkum mjólkurvörum geti dregið úr líkunum á hjartasjúkdómum. Aðalhöfundur rannsóknarinnar segir að það skipti meira máli hvaðan fitan, sem fólk neytir, komi en magn hennar.

The Guardian skýrir frá þessu. Fram kemur að neysla á fituríkum mjólkurvörum geti hugsanlega tengst minni hættu á að fólk fái hjartasjúkdóma. Niðurstaða rannsóknarinnar bendir til að það sé ekki verra fyrir heilsuna að neyta fituríkra mjólkurvara.

Það var alþjóðlegur hópur vísindamanna sem gerði rannsóknina en niðurstaða hennar gengur gegn viðteknum hugmyndum um að fituríkar mjólkurvörur séu óhollar vegna mikillar mettaðrar fitu.

Vísindamennirnir rannsökuðu 4.150 sextuga Svía og mældu hversu mikið var af ákveðnum fitusýrum í blóði þeirra, fitusýrum sem eru í mjólkurvörum. Fylgst var með þátttakendunum í 16,6 ár að meðaltali og skráð hversu margir létust eða fengu hjartaáfall, heilablóðfall eða ýmsa hjartasjúkdóma.

Þeir þátttakendur sem voru með mikið magn mjólkurfitusýra í blóðinu voru í minnstri hættu á að glíma við hjartasjúkdóma. Vísindamennirnir komust einnig að því að neysla á fituríkum mjólkurvörum jók ekki líkurnar á ótímabærum dauða.

Kathy Trieu, aðalhöfundur rannsóknarinnar, segir að neysla fitu og tengsl hennar við hjartað sé flóknari en áður var talið. Hún sagði að sífellt fleira bendi til að það skipti meira máli hvernig fitu er neytt en hversu mikillar.