Skjölin voru send til aðgerðastöðva CIA en í þeim eru sett fram varnaðarorð um að CIA missi alltof marga uppljóstrara um allan heim vegna þess að þeir séu handteknir, drepnir eða snúist á sveif með óvininum og byrja að vinna fyrir hann.
New York Times skýrir frá þessu. Þessi afhjúpun hefur orðið til þess að fyrrum starfsmenn CIA hafa varað við ástandinu og segja að stofnunin glími við sögulegan vanda þar sem óvinir á borð við Rússland, Kína og Íran séu að taka forystuna frá CIA í þeirri mikilvægu baráttu að afla upplýsinga um óvinina.
Þetta er ekki í fyrsta sinn sem upplýsingar koma fram um að CIA missi uppljóstrara en þetta er í fyrsta sinn sem almenningur fær vitneskju um hversu mikið umfangið er og að það sé mun meira en áður var talið.
Allt frá stofnun CIA árið 1947 hefur það verið verkefni stofnunarinnar að útvega ráðamönnum leynilegar upplýsingar um hvað er að gerast í heiminum. Uppljóstrarar eru bráðnauðsynlegir í þessum efnum því þeir afla upplýsinga og koma til starfsmanna CIA um allan heim.
Eitt þekktasta málið er frá 2009 þegar CIA reyndi að ráða jórdanskan lækni til starfa en hann sagðist hafa beinan aðgang að forystumönnum al-Kaída. En þegar liðsmenn CIA fóru til fundar við hann þann 30. desember í bandarísku Camp Chapman herstöðinni í Afganistan sprengdi hann sig í loft upp og tók sjö liðsmenn CIA með í dauðann. Þetta var mannskæðasta árásin á CIA í 25 ár. Síðar kom fram að læknirinn hafði starfað fyrir al-Kaída og hafði blekkt CIA upp úr skónum.
