Joel Morrison, sem býr í Kaliforníu, mun væntanlega ekki gleyma því sem hann sá við gröf eina í Saint Joseph Catholic Cementery í Sacramento nýlega. Eflaust hefðu hárin risið á mörgum við þá sjón sem mætti honum.

Samkvæmt því sem segir í frétt New York Post þá hnaut Morrison nánast um þetta við rúmlega 100 ára gamla gröf.  „Þegar ég uppgötvaði þetta brá mér rosalega. Þetta var frekar óhugnanlegt,“ sagði Morrison í samtali við Jam Press.

„Þegar ég skoðaði þetta betur sá ég að þetta var hár á manneskju,“ sagði hann.

Myndband af þessu hefur farið mikinn á TikTok en á því sést dökkt hár standa út undan legsteininum.

Morrison sagðist telja að hárið standi út undan legsteininum því rót á tré, sem er nærri, sé orðin svo stór að hún nái inn í gröfina. Hún hafi einfaldlega ýtt hluta af jarðnesku leifunum upp að yfirborðinu.