Bandaríski herinn lauk brottflutningi sínum frá flugvellinum í Kabúl í Afganistan í gærkvöldi. Chris Donahue liðsmaður 82. fallhlífasveitar var síðasti bandaríski hermaðurinn til að yfirgefa Kabúl þegar hann gekk um borð í C-17 flutningavél.
Bandaríska varnarmálaráðuneytið birti meðfylgjandi mynd af honum á leið inn í flugvélina. Með brotthvarfi Bandaríkjahers er 20 ára veru hans í landinu lokið. Rúmlega 2.400 Bandaríkjamenn féllu í átökum í Afganistan á þessum tíma og tugir þúsunda Afgana létust.
Sky News segir að Kenneth F McKenzie, hershöfðingi, hafi á fréttamannafundi í Pentagon tilkynnt að brottflutningi herliðsins væri lokið. Hann sagði að Ross Wilson, sendiherra Bandaríkjanna í Afganistan, hafi farið með síðustu vélinni frá Kabúl.
Antony Blinken, utanríkisráðherra, sagði að diplómatískum málefnum Bandaríkjanna gagnvart Afganistan verði nú sinnt frá sendiráði landsins í Doha í Katar, að minnsta kosti um sinn á meðan nýr kafli í samskiptum Afganistans og Bandaríkjanna hefst.
Qari Yusuf, talsmaður Talibana, sagði að sögn Al Jazeera, að endanlegt brotthvarf bandaríska herliðsins þýði að Afganistan hafi „öðlast fullt sjálfstæði“.
https://twitter.com/DeptofDefense/status/1432492782837501956?ref_src=twsrc%5Etfw%7Ctwcamp%5Etweetembed%7Ctwterm%5E1432492782837501956%7Ctwgr%5E%7Ctwcon%5Es1_&ref_url=https%3A%2F%2Fpublish.twitter.com%2F%3Fquery%3Dhttps3A2F2Ftwitter.com2FDeptofDefense2Fstatus2F1432492782837501956widget%3DTweet
