Átta ára drengur, sem er hindúi, er í haldi lögreglunnar í austurhluta Pakistan en hann hefur verið kærður fyrir guðlast og á dauðadóm yfir höfði sér. Lögreglan er með drenginn í haldi þar sem óttast er um öryggi hans. Fjölskylda hans er í felum og margar hindúafjölskyldur í Rahim Yar Khan, í Punjab, hafa flúið heimili sín í kjölfar árása æstra múslima á Hindúahof í síðustu viku eftir að drengurinn var látinn laus gegn tryggingu. Hermenn voru sendir á svæðið til að halda uppi lögum og reglum.

The Guardian skýrir frá þessu. Fram kemur að drengurinn sé sakaður um að viljandi kastað af sér vatni á teppi á bókasafni þar sem rit um trúarleg efni eru geymd. Þetta á hann að hafa gert í síðasta mánuði. Ákærur fyrir guðlast geta haft dauðadóm í för með sér.

Lögmönnum og sérfræðingum í lögum er mjög brugðið vegna kærunnar á hendur drengnum en aldrei áður hefur nokkur svo ungur verið kærður fyrir guðlast í Pakistan.

Lög um guðlast hafa mikið verið notuð gegn minnihlutahópum í Pakistan. Enginn hefur verið tekinn af lífi fyrir guðlast síðan dauðarefsing var tekin upp fyrir slík brot 1986 en æstur múgur ræðst oft á og drepur fólk sem er sakað um guðlast.