Joe Biden Bandaríkjaforseti kallar eftir því að ríkin 50 sem mynda Bandaríkin taki upp á því að greiða hverjum þeim sem lætur fullbólusetja sig eitt hundrað Bandaríkjadali, um 12.400 íslenskar krónur. Þetta kom fram í ræðu Biden í Hvíta húsinu sem hann hélt í lok vikunnar.

Lagði hann til að fjármunirnir fyrir greiðslunum yrðu sóttir í styrktargreiðslur sem alríkið greiddi ríkjunum vegna Covid-19 faraldursins í mars á þessu ári. Styrkirnir, sem voru hluti af áætluninni „The American Rescue Plan“ námu milljörðum dala, hundruðum milljarða íslenskra króna.

„Ég veit að það að borga fólki fyrir að bólusetja sig gæti þótt ósanngjarnt gagnvart fólki sem hefur þegar látið bólusetja sig, en staðan er einfaldlega sú að ef hvatar hjálpa okkur að komast út úr þessum faraldri, þá ættum við að nýta þá hvata.“

Biden sagði jafnframt að víðtækar bólusetningar væru leið út úr faraldrinum. „Já, sumir munu áfram greinast jákvæðir fyrir Covid-19 þó þeir séu bólusettir, en það er líka þannig með önnur bóluefni við öðrum sjúkdómum og slík tilfelli eru sjaldgæf. Svo til öll tilfelli um andlát eða alvarleg veikindi af völdum Covid-19 varða einstaklinga úr röðum óbólusettra.“

Þá tilkynnti Biden að starfsmönnum alríkisins sem ekki hafa verið bólusettir verður gert skylt að ganga með grímu sama á hvaða starfsstöð er unnið, gangast undir skimun einu sinni til tvisvar í viku, aðgreina sig frá öðrum starfsmönnum. Þá verður þeim ekki leyft að ferðast vegna starfa sinna.

Myndbandið af ræðu Biden má sjá hér að neðan.