Dragðu úr hraðanum, þú mengar. Þetta er boðskapurinn sem ökumenn á átta breskum hraðbrautum fá nú þegar hámarkshraðinn á þeim verður lækkaður niður í 60 mílur á klukkustund en það eru um 100 km/klst. Markmiðið með þessu er að draga úr mengun á þessum hraðbrautum en hún er töluvert yfir viðmiðunarmörkum.
Autocar skýrir frá þessu. Fram kemur að samgönguráðuneytið og vegagerðin hafi tekið þessa ákvörðun. Loftgæði voru rannsökuð á 101 vegarkafla og niðurstaðan var að mengun væri of mikil á 30.
Ástæðan fyrir að hámarkshraðinn verður ekki lækkaður á öllum þessum vegarköflum er að á sumum þeirra myndi það ekki hafa nein merkjanleg áhrif á mengunina.
Einnig er unnið að öðrum aðgerðum til að draga úr mengun, til dæmis verður reynt að draga úr mengun frá strætisvögnum.
