Þau sem voru myrt voru Bretarnir Saad al Hilli, 50 ára, eiginkona hans Iqbal, 47 ára, Suhaila al-Allaf, móðir Iqbal, 74 ára, og franski reiðhjólamaðurinn Sylvain Mollier, 45 ára.
Al-Hilli fjölskyldan, sem var frá Claygate í Surrey, var skotin af stuttu færi þar sem þau sátu í BMW bifreið sinni. Mollier var skotinn fimm skotum og fannst lík hans nærri bifreiðinni. Fjögurra og sjö ára dætur al-Hilli hjónanna sluppu lifandi frá ódæðisverkinu. Sú yngri náði að fela sig en sú sjö ára var skotin og barin en slapp samt sem áður lifandi.
Ekki er vitað hvort það var al-Hilli eða Mollier sem voru í raun skotmarkið. Mollier starfaði í kjarnorkuiðnaðinum.
Eric Maillaud, sem var saksóknari málsins 2013, sagði þá að lögreglan væri að eiga við þrautþjálfaðan morðingja.
Sky News segir að nú séu uppi vangaveltur um tengsl afbrotamanna, sem tengjast frímúrarareglu í París, við morðin. Um er að ræða gengi afbrotamanna. Félagar í því hafa játað að hafa njósnað um fólk, hótað fólki og beitt það ofbeldi. Sumir hafa að sögn Sky News játað að hafa komið að morði á rallökumanni í austurhluta Frakklands og áætlun um að myrða markþjálfa í París.
Í febrúar var skýrt frá því að byssukúlur, sem passa við Luger P06 skammbyssuna sem var notuð við morðin í Ölpunum, hafi fundist heima hjá einum meðlimi gengisins. Sá er fyrrum háttsettur yfirmaður hjá franskri leyniþjónustustofnun.
Annar meintur meðlimur glæpagengisins, Frederick Vaglio, 50 ára, fæddist í Annecy og var með viðskiptaumsvif þar bæði fyrir og eftir morðin. Samkvæmt fyrirtækjaskrá stofnaði hann almannatengslafyrirtæki í bænum 2009 en það lagði upp laupana nokkrum dögum fyrir morðin. Hann stofnaði öryggisfyrirtækið Meliora árið 2016 en það er skráð heima hjá foreldrum hans í Annecy. Hann rak einnig fyrirtækið Naberat Events sem skipulagði rallkeppnir.
Nágranni hans í París sagðist oft hafa heyrt skothríð frá húsi hans en orðrómur hafi verið uppi um að þar væru skotvopn prófuð utandyra. Hann sagðist jafnframt oft hafa séð fólk, „hermannatýpur“, koma og fara.
Franskur maður er sagður hafa boðið Vaglio 75.000 evrur fyrir að ráðast á Marie-Helene Dini, markþjálfa í París. Tveir liðsmenn frönsku leyniþjónustunnar DGSE eru sagðir hafa verið ráðnir til verksins en þeir voru handteknir fyrir utan heimili Dini í júlí á síðasta ári. Þeir voru vopnaðir hnífum og byssu. Níu manns, þar á meðal Vaglio, eru nú í gæsluvarðhaldi vegna meintrar áætlunar um að myrða Dini. Vaglio er sagður hafa tekið tilboði um að fá 12.000 evrur fyrir að myrða rallökumanninn Laurent Pasquail, 43 ára. Lík hans fannst í september 2019. Radio France segir að Vaglio hafi játað tengsl við málið neiti að hafa fyrirskipað morðið.
Hvað varðar morðin í Ölpunum 2012 hefur Sky News eftir heimildarmanni innan lögreglunnar að hugsanleg líkindi séu á því morði og öðrum málum tengdum þessum hópi. „Í aðgerðinni í Ölpunum voru líklega fleiri en einn morðingi að verki og líklega voru það aðilar sem hafa hlotið hernaðarþjálfun. Vísbendingarnar eru þarna. Í Alpamálinu voru morðingjarnir mjög heppnir því enginn sá þá. Þeir kunna að nota vopn og þeir vita hvernig á að komast á brott,“ sagði heimildarmaðurinn. Annar heimildarmaður innan lögreglunnar staðfesti að lögreglan útiloki ekki að glæpagengið tengist morðunum í Ölpunum í september 2012.
