Leðurblökur liggja undir grun um að hafa smitað eitthvað dýr af kórónuveirunni, sem veldur COVID-19, sem smitaði síðan fólk. Það er því kannski ekki að furða að sumir séu því kannski skelkaðir við að vera í návist leðurblaka. Það átti að minnsta kosti við farþega í flugvél Air India sem var á leið frá Nýju Delí til New York aðfaranótt sunnudags.

Independent segir að flugmenn vélarinnar hafi neyðst til að snúa við eftir um hálfrar klukkustunda flug því leðurblaka hafði komið sér fyrir í viðskiptafarrýminu.

Þegar fólk tók eftir leðurblökunni var flugstjóranum tilkynnt um þennan laumufarþega og eftir að hann hafði ráðfært sig við stjórnendur á jörðu niðri var ákveðið að snúa við og lenda aftur í Nýju Delí. Þar fóru dýralæknar um borð og fönguðu leðurblökuna og aflífuðu hana.

Farþegarnir urðu að skipta um flugvél en komust til New York en þó fjórum klukkustundum of seint miðað við upphaflega áætlun.