Daglega notum við gervihnetti, sem eru á braut um jörðina, til margvíslegra hluta. Um þá fer mikið af fjarskiptum, beinar útsendingar í sjónvarpi og GPS-staðsetningarkerfið byggir á gervihnöttum. Í framtíðinni verður einnig mikilvægt að geta átt í álíka fjarskiptum á tunglinu og einnig þurfa geimfarar að rata þar um. Af þeim sökum ætlar Evrópska geimferðastofnunin ESA nú að koma upp Internetsambandi á tunglinu og GPS-kerfi. Hefur stofnunin nú tilkynnt að verkið verði boðið út.

Paul Verhoef, hjá ESA, sagði nýlega á fréttamannafundi að margar þjóðir hafi í hyggju að senda fólk til tunglsins. Það verði dýrt að koma upp fjarskiptakerfi þar en það sé þess virði.

Eins og staðan er núna þurfa geimfarar að taka fjarskiptabúnað með sér út í geiminn. Slíkur útbúnaður er dýr og vegur oft um 40 kíló. Það mun því auðvelda málin ef sameiginlegu fjarskiptakerfi verður komið upp á braut um tunglið. Geta geimfarar þá einfaldlega tengt sig við það að sögn ESA.

Þeir þurfa þá ekki lengur að taka fjarskiptabúnað með sér út í geiminn.