Það er óhætt að segja að breska fyrirtækinu Lovehoney, sem er stærsti söluaðili kynlífsleikfanga á Bretlandseyjum, hafi hlotnast mikill heiður nýlega. Þá fékk fyrirtækið Queen‘s Award for Enterprise fyrir góða sölu en á síðustu sex árum hefur sala fyrirtækisins aukist um 365%. Í rökstuðningi Elísabetar II fyrir verðlaununum segir að þau fái fyrirtækið fyrir „einstakan og viðvarandi vöxt“.

Viðurkenningin þýðir að fyrirtækið má nú nota merki drottningarinnar við markaðssetningu og á umbúðum næstu fimm árin. Þetta þykir mikill gæðastimpill í Bretlandi.

Þetta er í annað sinn sem Lovehoney fær þessi verðlaun en fyrirtækið fékk þau einnig fyrir fimm árum.

Fyrirtækið nýtur sérstaklega mikillar velgengni vegna einkaréttar á framleiðslu og sölu leiktækja sem eru kennd við „Fifty Shades of Grey“.