Danir eru farnir að huga að sumarfríum sínum og má ætla að flestir reikni með að halda sig innanlands í sumar vegna heimsfaraldurs kórónuveirunnar. Þetta er byggt á tölum um bókanir á sumarhúsum innanlands í sumar en í lok mars voru þær orðnar 142% fleiri en á sama tíma á síðasta ári.
Búið var að bóka 85.600 vikur í sumarhúsum í júlí og ágúst af Dönum. Þetta kemur fram í tölum frá dönsku hagstofunni. Þetta vegur á móti mun færri bókunum frá Þjóðverjum sem eru yfirleitt fjölmennasti hópur leigjenda á dönskum sumarhúsum.
Ástæðan fyrir miklum samdrætti í bókunum þeirra er heimsfaraldurinn og óvissa í tengslum við hann og þær reglur sem gilda um komur ferðamanna til Danmerkur þessa dagana.
