COVID-19 veldur ekki aðeins líkamlegum þjáningum því margir sjúklingar glíma einnig við andleg eftirköst af sjúkdómnum. Þetta eru niðurstöður nýrrar rannsóknar vísindamanna við Oxford University. Þeir rannsökuðu áhrif sjúkdómsins á andlega heilsu fólks og áhrif hans á þá sem þjást af andlegum sjúkdómum.

Niðurstöður rannsóknar þeirra hafa verið birtar í The Lancet Psychiatry en þær byggja á gögnum um 69 milljónir manna. Af þeim höfðu 62.354 greinst með COVID-19 á tímabilinu frá janúar fram í ágúst á síðasta ári.

Fram kemur að fimmti hver COVID-19 sjúklingur greinist með andlegar þjáningar á borð við kvíða og þunglyndi innan þriggja mánaða eftir að þeir greinast með sjúkdóminn. Einnig kemur fram að fólk, sem þjáist af andlegum veikindum, sé 65% líklegra til að greinast með COVID-19 en aðrir.