Umfangsmikil lögregluaðgerð stendur nú yfir í Gustavsberg, við Stokkhólm í Svíþjóð, og hefur gert síðan 8 í morgun. Fjöldi lögreglumanna er að störfum á svæðinu, sem hefur verið lokað af, og þyrla lögreglunnar sveimar yfir. Flugbann hefur verið sett í eins kílómetra radíus frá svæðinu.

Sænska ríkisútvarpið og Aftonbladet skýra frá þessu. Segja báðir miðlarnir að talsmenn lögreglunnar vilji ekki segja um hvað málið snýst annað en að verið sé að rannsaka alvarlegt afbrot.

Aftonbladet segir að sérstakur rannsóknarhópur, sem er sérhæfður í rannsókn allra alvarlegustu afbrota, hafi verið kallaður út vegna málsins.