Mikið vetrarveður herjaði á Bandaríkin síðustu vikur og lagðist sérstaklega þungt á New York og Texas þar sem um 70 manns létust. Kerry benti á að þegar rætt er um loftslagsbreytingarnar telji margir að aðeins sé átt við hlýnandi veðurfar en það sé ekki svo því loftslagsbreytingarnar valdi einnig kuldaköstum á borð við það sem skall á Bandaríkjunum nýlega.
„Ég held að rétta leiðin til að horfa á þetta sé að þetta er tengt hlýnun jarðar, jafnvel þótt maður af eðlishvöt segi fyrst að hér sé um nýja ísöld að ræða. En það er ekki svo. Þetta er hluti af hnattrænni hlýnun og þetta ógnar öllum eðlilegum veðurkerfum,“ sagði Kerry og bætti við: „Við verðum auðvitað að gera allt sem við getum til að þetta verði ekki nýja normið.“
Hann telur að þörf sé á hörðum aðgerðum, mun harðari en heimsleiðtogar féllust á með Parísarsamkomulaginu fyrir nokkrum árum. „Ef við gerum allt sem við skrifuðum undir í París þá mun meðalhitinn á jörðinni samt hækka um 3,7% sem er ávísun á hörmungar,“ sagði hann og bætti við að klukkan tifi: „Fyrir þremur árum sögðu vísindamenn að við hefðum 12 ár í viðbót til að forðast verstu afleiðingar loftslagsvandans. Nú eru þrjú ár liðin svo við eigum níu ár eftir.“
