Það var sannarlega örlagaríkur dagur í október 2018 þegar Tommy Piluyev fór í bíltúr með eiginkonu sinni og dóttur í Sacramento í Bandaríkjunum. Þau renndu við á Starbucks og keyptu sér te. Þau fóru í lúguna til að þurfa ekki að fara úr bílnum. Þau pöntuðu sér tvö glös af Honey Citrus Mint en þegar starfsmaður ætlaði að rétt þeim glösin inn um gluggann á bílnum varð óhapp.

Samkvæmt frétt Daily Star þá hafði lokið á öðru glasinu losnað þannig að op var á milli þess og glassins. Svo óheppilega vildi síðan til að botninn á glasinu rakst í bílrúðuna og valt og teið helltist yfir Piouyev, sem var þá 22 ára.

Sjóðandi heitt teið lenti á höndum hans, maga, innanverðum lærunum og í klofinu. Hann komst ekki út úr bílnum því hann var alveg upp við bílalúguna. Hann ræsti bílinn því og ók yfir á nærliggjandi bílastæði þar sem hann stökk út og fór úr buxunum. En sjóðandi heitt teið hafði þá valdið miklum skaða á líkama hans.

Hann hefur nú höfðað mál á hendur Pactiv Packagin Inc. sem framleiðir glösin sem Starbucks notar undir heita drykki. Í málsskjölunum kemur fram að hann hafi hlotið að minnsta kosti annars stigs bruna á níu fingrum og geti því ekki lengur spilað á píanó. Þess utan á hann í erfiðleikum með að stunda kynlíf því getnaðarlimurinn brenndist einnig. Það varð til þess að hann hefur ekki sömu tilfinningu í honum og áður auk þess sem hann er mislitur.

Fleiri mál hafa verið höfðuð vegna heitra drykkja sem hafa sullast yfir viðskiptavini Starbucks og segir lögmaður Piouyev að margir viðskiptavinir og starfsmenn hafi kvartað yfir gölluðum lokum og glösum. Hjá Starbucks er te 88 til 93 gráður þegar það er borið fram.