Bandarísk stjórnvöld saka hryðjuverkasamtökin Hezbollah um að vera að sanka að sér vopnum og ammoníumnítrati víða í Evrópu. Þetta er sagt vera geymt víða í álfunni og eigi að nota í hryðjuverkaárásum í framtíðinni, árásum sem stjórnvöld í Íran muni fyrirskipa.

The Guardian skýrir frá þessu. Fram kemur að það hafi verið Nathan Sales, hjá gagnhryðjuverkadeild varnarmálaráðuneytisins, sem hafi sagt þetta og um leið hvatt Evrópuríki til að taka harðar á Hezbollah.

Ásakanirnar koma sex vikum eftir hina gríðarlegu sprengingu í Beirút í Líbanon þar sem vörugeymsla full af ammoníumnítrati sprakk með hörmulegum afleiðingum. Efnið hafði verið þar í sex ár. Hezbollah er sagt hafa mikil áhrif á rekstur hafnarinnar í Beirút.

Sales sagði að vopn frá Hezbollah hafi verið flutt í gegnum Belgíu, til Frakklands, Grikklands, Ítalíu, Spánar og Sviss. Einnig hafi yfirvöld lagt hald á mikið magn af ammoníumnítrati í Frakklandi, Grikklandi og á Ítalíu.

Hann varpaði fram spurningu um af hverju Hezbollah væri að geyma ammoníumnítrat í Evrópu og sagði að svarið væri augljóst. Þá sé hægt að fremja stór hryðjuverk hvar sem þörf er á að mati stjórnendanna í Teheran.