Á fimmtudag í síðustu viku fundu mexíkóskir tollverðir 102,5 kíló af kókaíni um borð í danska flutningaskipinu Svendborg Mærsk sem er í eigu Mærsk skipaútgerðarinnar. Verðmæti kókaínsins er um 1,2 milljónir dollara að sögn mexíkóska dagblaðsins El Universal.

Það var fimmtudaginn 2. júlí sem tollverðir og sjóliðar fóru um borð í skipið og voru með fíkniefnaleitarhunda meðferðis. Þeir fundu kókaínið.

Í gámnum, sem kókaínið var í, fundust einnig tveir hafnarverkamenn í felum.

Samkvæmt frétt El Universal höfðu tollayfirvöld fengið ábendingu um að fíkniefni væru í skipinu og því var leitað í því þegar það lagðist að bryggju í Manzanillo. Skipið var að koma frá Balboa í Panama og hafði þar áður verið í Buenaventura í Kólumbíu.