Niðurstöður rannsóknarinnar hafa ekki enn verið ritrýndar. Vísindamennirnir, sem eru með stærðfræðimenntun, hafa opinberað einhverskonar ættartré kórónuveiru sem veitir yfirsýn yfir hvernig veira berst manna á milli. Danska ríkisútvarpið skýrir frá þessu.
Ættartréð sýnir meðal annars, eins og við var búist, að smitið barst aðallega til Danmerkur frá skíðastaðnum Ischgl í Austurríki. En um leið hafa Danir mjög líklega borið veiruna með sér til Íslands, Svíþjóðar og Lettlands að sögn Matthias Christandl, prófessors við stærðfræðideild Kaupmannahafnarháskóla. Ritzau hefur eftir honum að sama stökkbreytta afbrigðið, sem er mjög útbreitt í Danmörku, skjóti upp kollinum á Íslandi, í Svíþjóð og Lettlandi. Það sé því nærliggjandi að telja að stökkbreytingin hafi átt sér stað í Danmörku og síðan hafi hún breiðst til fleiri landa.
