Félagasamtök hafa varað við því að áframhaldandi verslun með hundakjöt gæti aukið hættuna á því að nýir sjúkdómar breiðist út. Sérfræðingur í málefnum Kína, sagði í viðtali við Sky News að það væri vitað að sjúkdómsfaraldrar geti brotist út þar sem mikill fjöldi dýra af mismunandi tegundum safnast saman, dýr sem eru með veik ónæmiskerfi.
Kínverskir aðgerðarinnar, sem heimsóttu Yulin, áætluðu að minnst 400 hundar og 200 kettir væru seldir á hverjum degi í þessari viku, en nú er stutt í árlega hundakjötshátíð, sem farið hefur fram síðan 2010. Myndir sem Sky News hefur undir höndum, sýna bása með hangandi hundshræjum. Hundarnir sem enn eru lifandi eru geymdir í þröngum, troðnum búrum, við hlið borðs slátrarans.
Fyrr á þessu ári breytti landbúnaðarráðuneyti Kína því hvernig hundar eru flokkaðir, þannig að þeir teljast ekki lengur til búfénaðar. Þetta eru þó aðeins leiðbeiningar, ekki lög. Yfirvöld í borgunum Shenzhen og Zhuhai, sem báðar eru í Guangdong héraðinu, urðu, fyrr á þessu ári fyrst til þess að banna sölu á hundakjöti. Þrátt fyrir að hundakjöt sé enn selt í Yulin, virðast leiðbeiningarnar hafa dregið úr sölunni.
Aðgerðarsinnarnir segja að salan hafi öll farið fram á einum markaði og sumir sölumannanna tjáðu aðgerðarsinnunum að þeir væru hræddir um að básum þeirra verði lokað þegar nær dregur hátíðinni, sem hefst á sunnudag.
Starfsmaður sláturhúss sagði að það væri orðið erfiðara að flytja hundakjöt inn til héraðsins, vegna þess að kínversk yfirvöld hafi hert reglur um flutning dýra á milli héraða. Fyrr á þessu ári bönnuðu yfirvöld í Kína verslun og neyslu á villtum dýrum til þess að bregðast við kórónuveirufaraldrinum.
Aðeins lítill minnihluti Kínverja borðar hundakjöt. Könnun sem unnin var af kínverskum samtökum um dýravelferð í samvinnu við Humane Society International árið 2017 sýndi að 64% Kínverja vilja að hundakjötshátíðin í Yulin verði stöðvuð og 51,7% vilja að öll verslun með hundakjöt verði bönnuð.
Sérfræðingur í málefnum Kína segir að það sé afar mikilvægt að yfirvöld setji lög á hundakjötsiðnaðinn.
